Senin, 12 November 2012

KISAH DATU PARNGONGO

TURI-TURIAN DATU PARNGONGO
By: Jonny Hartono Sidabutar
I.        BORU TAGAN-TAGAN DAIRI
Datu Parngongo ima siampudan ni ompunta Raja Sirumaganjang. Tarbarita do ompunta on na malo jala marhadatuon. Jala sahat tu daerah Barus do anggo pardalanan ni ompunta on laho manguji hamaloanna i. Di sada tingki mulak sian daerah Barus mangalewati daerah Dolok Sanggul (huta ni marga Lumban Gaol), dibege ompungi ma sada soara ni parompuan marende mansai tabo begeon. Sai lulu-lulu ma ompunta on didia do parompuan na marende i. Jala disungkuni ompungi ma parhuta i, alai dang adong na olo pabotohon. Akhirna sahat ma ompuntai tu sada jabu ala hira-hira sian jabu i do dibege ompunta soara i. Dung marsantabi ompuntai i tu parjabu i laos dipaboa ma sangkap na ima naeng marsitandaan dohot na marende i.
Ala sai dipangidohon ompunta do naeng marsitandaan dohot parompuan na marende i, dibahen amang parjabu i ma parpadanan dohot ompu i, ima molo naeng berengon ni ompunta parompuan i ba ingkon boanon ni ompunta ma i gabe sinondukna. Ala nunga tung mansai tabo panghilalaon ni ompung i di ende dohot soara ni parompuan na binegena gabe dioloi ompungi ma. Dung i dipatuduhon ma tu ompung i sada parompuan na mansai metmet na digoari Tagan-Tagan Dairi.
Tarsonggot ma Datu Parngongo marnidasa, alai ala naung didok Datu Parngongo hatana ondeng, diboan ma boru Tagan-tagan Dairi mulak tu huta na tu Tamba. Di tonga dalan didok Datu Parngongo ma tu parompuan i na naung adong hian do parsondukna di Tamba (ima boru Pasaribu), jala disungkun boha ma bahenon nasida asa boi marsaripe. Dungi dialusi Tagan-tagan Dairi jala dipangido asa andorang so sahat nasida di huta, didok ma asa ditinggalhon ompungi ibana di sada batu, jala ingkon tomu-tomuon ni keluarga ni Datu Parngongo ma ibana tu batu i.
Dioloi Datu Parngongo ma na nidok ni Tagan-tagan Dairi i. Andorang so sahat tu huta di bahen ma ulos na tu Batu asa adong inganan ni Tagan-tagan Dairi. Dungi laho ma ibana tu huta pabotohon tu natorasna na mamboan boru muse ibana. Rap ma Datu Parngongo manomu Tagan-Tagan Dairi tu inganan na i. Dung sahat disi dijumpangi nasida ba sada parompuan na uli, ai nunga maruba Tagan-tagan Dairi gabe pardaging na normal.  Tarsonggot do Datu Parngongo marnidasa. Alai dung dipatorang parompuan I na ibana do Tagan-tagan Dairi, diboan ma ibana masuk tu huta. Laos dipestahon ma disi.
Dung sadia leleng ro ma Raja Lumban Gaol mangebati huta Tamba naeng marnida boru dohot hela nasida. Ala ndang dijumpangi nasida be Tagan-tagan Dairi na metmet i, muruk ma nasida tu Datu Parngongo ai dipingkir nasida na diambolongkon Datu Parngongo boruna. Jala ndang porsea Raja Lumban Gaol i na naung maruba boru nai. Alai ala sai margogo do parompuan I mandok na ibana do si Tagan-tagan Dairi gabe diparo Raja Lumban Gaol i ma babiat na  na sai rampak hian dohot si Tagan-tagan Dairi.  Dung ro babiat i pintor diumma babiat i ma tangan ni si Tagan-tagan Dairi. Gabe porsea ma Raja Lumban Gaol i na parompuan i do boruna ima si Tagan-tagan Dairi. Dung i marpesta bolon ma nasida di huta I manghalashon na masa i.

(Turi-turian on hudapot sian piga-piga natua-tua, jala sian pomparan ni Raja Ihutan Lumban Gaol pe tong do songon i didokhon. Di tingki marpesta tugu Raja Lumban Gaol di Dolok Sanggul taon 2009, diundang panitia do pomparan ni Datu Parngongo. Jala talehon do horbo nab alga songon siluanta tu Tulangta Lumban Gaol).

Tidak ada komentar:

Poskan Komentar