Senin, 30 Januari 2012

SEJARAH MARGA HARO MUNTHE

Ia Simbolon Tua tubu ni Tuanlen do, tubu ni na so hahuaondo ia anggo, Tamba Tua, Saragi Tua, Munte Tua, Sinahampun Tua, jala maralo roha do nasida na dua Inai, ala songon na marhasurungan do tubu ni Tuanlaeni, alani i didok Tamba Tua ma tu tubu ni Tuanlaeni: "Ia pados hamuma tu hami ruhut ni paradaton ai so dia imbarta ai anak ni amanta be do hita, ninna ma" dungi ro ma muse Simbolon Tua mangalusi: "Tung gabe raja ma hape tubu ni nasohahua?".

Ia dung songoni martup-tup ma tubu ni nasohahuai jadi didok Tamba Tua ma: "ta pol-pol ma pardalanan ni nasida, asa unang boi na sida meret manang tudia", dungi laho ma Saragi Tua tu utara naginoa ran nuaeng Saragi Tua(di utarani Pulo Samosir) mangambat nasida asa unang boi nasida laho tu onan langgiun laho patuba-ba. Jala si Nahampun ma laho tu Dairi, laho mangambat nasida asa unang boi dapotan sira, jala Munte Tua ma laho tu Tano Karo mangambat nasida laho manuhor hapas sigantion, anggo ahu tu Pintu Batu ninna si Tamba Tua, asa boi mangambat nasida laho matuba-ba tu Sihotang. Dungi borhat be ma nasida tu inganan naung tinontuhon ni na sidai.
Alai dung manang nasadia leleng dung marserak nasida, masa ma logoni ari marpiar-piar pala do mahiang angka gulu-guluan jala masa muse ma dohot haleon di Pangururan ima luat na tinading kon ni nasida i ,alani i marmanuk di ampang (martondung) ma Simbolon Tua manilik manang aha do namagissombut umbahen namasa songoni tu nasida, jala mangihuthon jaha-jahani parmanuhon ni nasidai ingkon naso hahuai do pardomuan ni nasida jala ingkon gondangan na do asa ro Udan Pareme.

Jadi dung songoni borhat ma Simbolon  Tua marsolu huhut mamalu ogung mandapothon si Tamba Tua tu Pintu Batu, dungi di sungkun si Tamba Tua ma, "aha do alana umbahen naro hamu mardoal-doal tu huta nami on?" "namanopoti sala nami do hami tu hamu asa ro Udan Pareme dihamian", nina Simbolon  Tua mangalusi. Alai dung didok Simbolon  Tua songoni marsidalian do Tamba Tua jala didok ma molo naido tu-tu hinarohon muna hutonahon ma jolo angka donganhu asa rap hami manjalo topot-topot munai. Toho tahe ninna rohani Simbolon Tua, dungi mulak manasida tu huta nasida.       

Alai dung manang nasadia leleng sai di paima-ima Simbolon Tua laos so adong ro boa-boa ni si Tamba Tua tole do logo ni ari sai lam mananggir ujung na gabe di lui-lui Simbolon Tua ma dalan na asing pasauthon sangkap ni nasida, laho ma muse nasida tu pasir ni Pintu Batu margondang jala roma torop halak mainondur tusi dungi di ida nasida ma disi anak ni si Tamba Tua pintor di tangkup mai jala di luahon ma tu pangururan laho gondanganna. Jadi dung sidung di gondangi dakdanaki, gabe roma udan paremean diluat ni nasidai.

Di na borhat Munte Tua tu Tanah Karo mangambat hapas asa unang adong si pangkeon ni Simbolon Tua laos maringanan ma ibana di si, jala adong do 2 (dua) anak na ima;

    1. Ompu Djelak Maribur

    2. Ompu Djelak Karo

Ia Ompu Djelak Karo tinggal do di Tano Karo jala pinomparna/keturunanna ima marga Ginting Munthe na adong di Tano Karo laos adong muse do pinompar nai na gabe Munthe Simalungun, alai anggo Ompu Djelak Maribur dung magodang ibana jala dung gabe Datu ibana di goari do ibana gabe "Datu Parultop" alana ultop do ula-ulana, ima na binoanna sian Tanah Karo jala Ultop Ipuh do goarna disi ima na adong nuaeng di huta SIBABIAT Negeri TAMBA.

Ia taringot tu pardalaman ni Ompu Djelak Maribur (Datu Parultop) songonon ma...........................................
Dung gabe Datu Ompu Djelak Maribur borhat do ibana sian Tanah Karo mardalani huhut manandangkon hadatuon huhut marultop sahat tu huta Padang Sidempuan (Tapanuli Selatan) naginoaran nuaeng, dung sahat disi mangajari do ibana, jala laos adong disi sada Tambak laos disuan do disi sada bunga na margoar bunga INTE-INTEAN (tanda-tanda) di sisean nai jala di tonahon ma tu siseannai; Molo malos do bunga on, naung adong ma parmaraan tu ahu ,ninna Ompu Djelak Maribur (Datu Parultop) jala lului hamu ma ahu manang na tu luat dia, ninna ma. Jala lehononku ma tu hamu tawar pangabang-abang tawar pangubung-ubung sipangolu naung mate, si parata naung busuk jala molo dung mate ahu di dapot hamu dais hon hamu ma ubat on asa mangolu songon na somal.

Adong do keturunan Ompu Djelak Maribur tinggal di Tapanuli Selatan ima marga Dali Munthe. Sian huta Padang Sidempuan borhat ma ibana muse tu Tano Silalahi manopi-nopi Tao Toba sahat tu Limbong Sagala, dung sahat ibana di Luat Sagala di sungkun ma pangisi ni luati: "Aha do namasa di luat on umbahen songon na longo-longo?", ninna Datu Parultop. Jadi dialusi pangisi ni hutai ma: " Adong di son sada pidong na jahat pidong si pitu ulu goarna na olo manghabangkon dakdanak, jadi molo haberengan pidongi pintor humalaput do hami martabuni sude. Dungi didok Ompu Djelak Maribur (Datu Parultop) ma muse tu na sida: "Aut sura boi hupamate lali si pitu ului aha do lehonon muna upahku..?". Dungi dialusi raja ni luat Sagalai ma: "molo boi dibahen hamu matei, pamilit mu ma boru nami dohot tano ni hami sagala on". Antong marpadan ma hita ninna Datu Parultop, ma dungi marpadan ma nasida: "TOGU URAT NI BULU TOGUAN URATNI PADANG, TOGU NIDOKNI UHUM TOGUAN NIDOK NI PADAN, HORI IHOT NI DOTON HATA DO SI INGOTON".

Dungi diparentahon si Datu Parultop ma manggali sada lubang nabagas boi jong-jong Raja Parultop dohot ultopnai. Jala di tutup ma dohot 7 (pitu) galapang ni sopo, jonok tu hau nabolon hasonggopan ni pidong i. Dung sidung sude dipature nasida roma tutu pidung sipitu ului tu hau na bolon i. Parjolo di ultop ma sada uluni pidongi laos hona, alani i marrimas ma pidongi jala dibereng ndang adong, holan galapang ni sopo do na adong di bonani haui, laos ditompas ma galapangi ujung na mabola sada galapangi, dungi di ultop Datu Parultop ma muse pa dua halihon gabe tinggal ma ulu ni pidongi 5 (lima) nai, songonima ujungna sampe habis sude ulu nipidong na pitui. Pidong ipe laos mate ma jala madabu tu bona ni haui jala si Datu Parultop pe laos di dondoni pidongi ma sian ginjang.

Alani i pusok ma hosa ni Datu Parultop di bagasan lubangi jala tung mansai gale situtudo ibana pala songon na mate berengon. Humalaput ma pangisi ni luati manarat bangke ni pidongi asa dibereng si Datu Parultop, dungi di abing ma si Datu Parultop laos di papodom ma tu bagasan sada sopo.

Di nasadari di bereng anak murid ni si Datu Parultop ma bunga inte-intean na adong di Tambak parpadanan ni nasidai nunga malos, hapogan ma nasida mandiori si Datu Parultop jala sahat ma nasida tu luat Sagala. Dibereng ma disi nunga tung gale situtu Datu Parultop, dungi dibahen ma tawar songon naung nitonahon ni Datu Parultop i tu murid nai ujungna gabe hipas ma Datu Parultop.

Taringot tu janji ni pangisi ni luat Sagalai di jouma si Datu Parultop ma millit boru ni luat Sagalai, jadi ro ma si Datu Parultop mandok; "tung boru ni ise pe hupillit naung boru muna mai Raja nami, jala pangidoanku suru hamu ma jolo boru munai maronan". Dung didok si Datu Parultop songoni martabuni ma antong si Datu Parultop di topi ni batang aek dalan ni angka paronani, laos dipilit Datu Parultop ma sada boru-boru na so manintak pahean na di tingki na mangalaosi aeki, jala ditontuhon Raja Sagala ma sada ari ima songon ari pajadihon borunai manortorma antong anak borui ni luati jala manortor ma muse si Datu Parultop laos di sangguli ma boru-boru naung panilit nai, ima boru Sagala. Dung leleng sorang ma sada boruna jala dung balga boru ni Datu Parultop i mulima tu marga Siboro laos ima manean arta ni si Datu Parultop na adong di tano Sagala.  

Di na sahali, di ultop si Datu Parultop ma sada pidong laos hona ma bonani habongna, alai tong do boi habang pidongi. Sai di ihut ihut hon mai laos sahat ma ibana tu tano TAMBA na ginoaran nuaeng. Di si di Ultop si Raja Parultop ma muse pidongi laos dapot jala di haruarhon ma eme sian boruranna laos di sampathon tu sada gulu-guluan na jonok tu huta SIBABIAT na ginoaran nuaeng “HUTA ON MA HUTA NI MARGA HARO MUNTHE NA ADONG di TANO TAMBA“. Dungi mardalani ma Raja Parultop muse laos di ida ma bogas ni pat ni jolma ima di paihut ihut gabe jumpang sa ma sada huta, ia dihutai martonun ma sada anak boru na uli di lambung ni sada bona ni unte naung malamun situtu. Didok Datu Parultop ma tu anak borui “ito, boi do jolo buatonku sada boras ni unte an?” dungi roma anak borui mangalusi, “ba buat hamu ma ito”, ninna. Dungi di jangkit Datu Parultop ma untei, laos di pangan.

Marnida i roma ijur ni anak borui, laos didok ma “Ia lehon hamu ma jolo sada di ahu ito, ninna”. Umbegesai roma si Datu Parultop di papungu ma untei tu sada hajut-hajut dungi di dok ma; tarehon hamuma ito, dungi roma anak borui di tarehon ma dohot abit na, hape tompuma di dabuhon Datu Parultop hajut na naung marisi godang untei, laos madabu ma abit ni anak borui, hapogan ma ibana paturehon abit nai huhut lao tu jabu. Dungi ro ma si Datu Parultop di papunguma untei laos di dok ma; “na hamu ma ito unte on, ninna”.
Ala naung lohot dirohana hinauli ni anak borui, di lului ma dalan boha asa saut Datu Parultop tu anak borui, dungi laho ma ibana sogot nai tu balik ni parik, siani di Ultop ma anak borui, ujungna gabe marsahit, laho ma anak borui tu jabu huhut morong-ngorong ro ma amantai, dijouma angka datu nalaho mangubati borunai alai ndang namarnamalum. Disada tingki ro ma Datu Parultop tu bagasi mardalani jala dibege-bege ma orong-orong ni boru-borui, dungi didok amantaima tu Datu Parultop, ia ubati hamu ma jolo borungkon, ninna. Jadi di ubati Datu Parultop ma dohot ubat tongos-tongosan alai nadang na marnamalum, ujung na ro ma sada ina-ina mandok bohado amang tung pareso hamu ma jolo dohot manat asa anggiat boi malum sahitnai, ninna.

Dungi dioloi Datu Parultop ma mangubati dohot denggan alai ditingki namangubati Datu Parultop sai mangkata-hatai ma halahi padua-dua sian na so pamotoan ni halak. Dung manang sadia leleng muba ma pamatang ni anak borui, jala sahit pe laos dipamalum ma.

Lulu-luluma rohani rajai mangida boru nai laos didok ma tu pardibagas na, ia tung boan ma jolo maridi boruntai, ai nungnga songon na asing parnidaan ku, ninna. Jadi laho ma tutu inantai dohot borunai martapian, toho do tutu nunga muba tutu pamatang ni anak borui. Jadi dung tangkas di boto naung denggan pamatang ni boru nai di papungu ma sude raja niangka luati, laho manunungkun Datu Parultop, manang na aha do margana. Ia dung pungu sude angka raja najinou dimulai ma pangkatai on jala didok amanta ima tu angka raja na jinouna; umbahenn na hujou hami pe hamu amang rajanami asa sungkun hamu ma jolo marga ni Datu Parultop on, ia anggo mambuat ibotona do ibana, tu ramba situtungon, tu aek siarsihon, seaton jala pamateon, alai anggo  na mambuat na patut do ibana denggan ma pasu-pasuon ai nunga muba pamatang ni borunta, ninna.

Onpe tutu Rajanami Datu Parultop, nunga dibege ho hata ni rajai na manungkun ma hami nuaeng tu hamu. Ahado tutu marga ni rajai? Ninna “panungkun sian raja na torop ma.

Jadi mapingkirma Datu Parultop ninna rohana, molo hudok margaki pamateonna ma ahu, ia huganti margaku, anak ni ise ma ahu dohonoku, ninna rohana.

Tangkas ma alusi hamu raja nami unang songon na marhuling-hulingan bahen hamu ninna raja na jinoui.

Jadi ndang tarelakhon si Datu Parultop be ujungna dialusi ma dohot sasitongna; “MUNTHE DO MARGAKU RAJANAMI, NINNA DATU PARULTOP HUHUT LAHO MARLOJONG TU BORU NI RAJAI LAOS DI ULOSI BORU-BORU IMA DATU PARULTOP HUHUT TUMATANGIS”.

Alani i mapingkir ma angka raja na jinoui, ninna ma: “NA NAMBUAT IBOTONA PE IBANA GABE MA NASO MAMBUAT IBOTANA IBANA GABE MA”, ala naung hubereng hami ndang tarsirang be hamu nadua, aut sura adong tahi nalaho parsiranghon olo do rap mate nasida nadua.

Alai naso adat naso uhum do on, ndang goaran be ibana Munthe gabe Haro Munthe ma goaron ibana ai haroan do na niulanai ninna raja najinoui ima.

JADI ON MA MULANA ASA ADONG MARGA HARO MUNTHE NA TINGGAL DI NEGERI TAMBA. IMA KETURUNAN NI OMPU DJELAK MARIBUR (DATU PARULTOP) HARO MUNTE NA MAMBUAT IBOTONA TUBU NI MARGA TAMBA LUMBAN TONGA-TONGA.

Dung manang na sadia leleng mar pinompar Datu Parultop Haro Munthe tubuna ima Ompu Saha Ulubalang (Parsanti Ulubalang) dohot Raja Isora, dung ma godang angka tubu nai Ompu Saha Ulubalang laho do tu Tano Humbang jala Raja Isora tinggal di Tano Tamba, jala torop di pinomparna tinggal disi sahat tu sadarion.

NB:

Disalin sarupa dohot aslina ima sinurat ni:

1. Fordinan Munthe

2. Patjius Munthe

Pada Tanggal 17 Oktober 1965.S

Sumber :
http://haro-munthe.blogspot.com/2011/01/sejarah-marga-haro-munte-bag-i.html

Tidak ada komentar:

Poskan Komentar